單車誌

報紙雜誌最近經常報道單車旅遊、單車達人、單車配飾等各類關於單車的資訊，單車熱潮不斷升溫，除了後生仔女之外，愈來愈多中女加入了單車運動的行列，竇蓉就是其中之一，而且愈踩愈起勁。可以令到行步路都懶、的士伸手黨突然投入運動行列，兼且不怕日曬雨淋，究竟單車有何吸引之處？

中女本來最喜歡行街Shopping嘆冷氣，但可能商場舖租太貴，只有大型連鎖品牌先計得掂數，所以個個商場都一定有Zara、H&M，行街買嘢失去了尋寶的樂趣；奢侈品牌如Prada、Gucci、LV之類，為了迎合國內新貴，產品愈賣愈貴，但品牌配合各大雜誌吹噓一輪，大小老嫩一齊跟風，就算忍痛買名牌，亦沒有凸顯身份、獎勵自己的少許快感，皆因大陸有錢阿太幾十萬咁掃貨，買一、兩件根本不算甚麼。

人到中年，開始不想受永遠滿足不到的虛榮心擺佈，希望發掘一些新興趣，自我提升，建立一種冷氣空間以外的生活態度，人同此心，所以近年多了不少人做運動，而戶外運動如長跑、踩單車亦愈來愈受歡迎！

竇蓉少女時代呆頭呆腦，一直不懂踩單車，去年忽然覺得如果可以踩單車去旅行，應該是一件幾型的事，於是捉住WikiPeter，在大埔單車徑學起，跌跌碰碰居然兩、三次就學識，自此周末、日就以踏單車為樂。做運動的好處的確有根有據，好多中女頸梗膊痛，寧願花錢按摩，信按摩師講，淋巴塞晒，要按多part或大力些按之類的說詞。日坐夜坐，血液唔流通就無錯，但最有效兼唔使錢的方法是做帶氧運動，加促血液循環，帶走積聚的尿酸，按到周身瘀晒，點解淋巴就會通番呢？

踩單車減肥功效遠遠不及跑步，但卻更適合平日少運動的中女，單車有槓桿原理，就算慢慢踩，都可以去到不少地方，沿途重可以欣賞到四時風景，在吐露港、大尾篤踩單車，感受吓清風，是簡單又快樂的事。近日坊間鬧哄哄，一時說廣東道已聽不到廣東話，跟住又輪到時代廣場UA戲院結業，香港黃金地段消費選擇單一化，本土意識抬頭，是另一個具爭議性的話題，面對這個環境，竇蓉選擇不再跟着商人的消費指揮棒走，LV大排長龍，Celine手袋waiting list長過水蛇春，那就乾脆不買好了，發掘生活中其他樂趣，好過買嘢搵氣受。

單車豐儉由人，但大體是偏向平的，買部私家單車幾百至幾萬元都有交易，就算萬多元一輛，起碼講得出性能有咩唔同，相反兩萬蚊買個袋，六千蚊買對鞋，功能性方面其實無分別。運動亦可以設定目標，這個目標可以是距離，可以是速度，一步一步達成，是屬於自己的小小成就感。

不過踩單車要有心理準備會曬黑，點搽防曬都難以抵抗紫外線。但如果為了美白，除了冷氣間以外的地方都不能久留，這樣的人生似乎太單調。