這兩天，特首選情風雲色變，唐英年下馬恐怕是遲早的事，之前佢民望只是低，目前是破產，若果佢當選，香港人恐怕會上街，竇蓉早在去年九月已貼過另一候選人任志剛，可惜個yahoo blog已被屏蔽，唯有在此原文照錄，即管看看事態發展如何。
特首跑馬仔遊戲又開始了，望落兩個疑似候選人，一個「不似人君」，另一個頭腦發熱，講就天下無敵，退休人士范婦人更加不用考慮。雖然特首選戰香港人根本no say，但就當猜度阿爺心意，特區應該重有其他人揀得落手吧？竇蓉心水乃任志剛，任總是也！
特首之戰最緊要阿爺點頭，呢點任總絕冇問題, 佢在中國財金界聲望甚高，金管局總裁一職令佢多年來處於政治中立的位置，港大畢業後就入了政府，少年時代亦沒有參與過反共活動，身家清白到極。
講能力，雖然佢有名「任一招」，但佢出掌金管局十六年來，經歷幾次金融風暴，銀行體系未出過大問題，呢點政績今日特區官員已做不到。你睇李小加一上場，一副雄心壯志的樣子，點知一個披露易down機，就曝露咗佢輕重不分，連藍籌停牌的連鎖反應佢都未搞清楚， 就諗住改革呢樣、改革嗰樣。
官鱷大戰一役中的三人，曾蔭權已做過七年特首，許仕仁做完輔政大臣就正式退休，既然特區冇人，試埋任志剛，點到好過搵唐唐。官鱷大戰係香港金融史上最戲劇式的一幕，唔可以純粹話當時主管金融政策呢三位人兄係幸運，幻想吓如果呢件事今日發生，交俾曾俊華、唐英年、陳德霖三人處理，相信一定整咗個completely rubbish出來！
政客一時嘈通賬、一時嘈樓價，好啦，到股樓齊跌，就嘈裁員。一個地方的經濟，同金融政策係分不開的，本城個聯繫匯率一直係通賬原凶，難為曾俊華重好意思話通賬同聯匯冇關係！拆唔拆聯匯，任總都係最有資格講，八十年代初佢重做緊首席助理金融司時，就有份參與制定聯匯，咁多年係金管局主要工作之一都係優化個聯匯，亦因為聯匯本身唔複雜，所以一直有人批評點解佢攞咁高人工。
除咗阿爺，選民其實主要係地產佬，地產佬個個都憎思歪當年整個八萬五，搞到大家鷄毛鴨血，唐唐肯定會維護大地主利益，所以班地產選民都企佢嗰邊，諗住兩害取其輕。如果任總出選，地產佬都應該放心，佢在任金管局，深明地產，金融唇齒相依，整死咗個地產, 百業蕭條，唔會搵自己笨。
最後一點先係民意，任總係唯一一個有國際知名度的香港財金管員 ，Greenspan, Soros都知佢咩水，出去外國唔失禮。再者, 市民對住一班開口夾着脷, 或一副公公模樣的官員，真係十分氣憤, 任總雖然成日咀藐藐D白痴記者同議員, 但佢講嘢令人好有信心，真正有大將之風。自從佢退任後, 每有金融動盪，陳德霖、曾俊華又學佢晨早返工, 同記者評論吓時局, 但睇見佢地一副口窒窒的樣子, 真係慘不忍睹, 唔講好過講。
近排港大風波搞到一鑊泡，曾蔭權唔係Kong U出身， 正式來講冇讀過大學， 有些迷信沙紙的人士會覺得， 紅褲子出身的人特別容易迷戀權貴，巴結權貴, 呢點頗難講，因為巴結權貴係人性，同讀書未必有關，不過任總出名心高氣傲，即使要巴結，應該都不會做得咁揚，唔會攞本簿仔出來抄筆記，對住個中國省市市長都急唔切扮矮仔。
至於佢會否捍衛新聞自由、集會結社自由、關懷弱勢社群，Well，相信佢唔會特別捍衛民主自由，根本係呢個制度下, 邊個人做特首都冇可能在政制方面有咩作為 ，其實只要維持原狀，不要好做唔做, 一時推行替補機制, 一時又心虛地搞到保安變了政治事件，其實香港人並唔難管。
雖然此乃個人一廂情願的想法，但阿爺其實唔笨，唐唐有幾不濟，相信佢地心中有數，期望佢地真係搵到隻黑馬，咪又再誤香港人五年又五年。
沒有留言:
張貼留言