的士之苦

「銅鑼灣崇光。」竇蓉跳上的士，報上目的地，便大安旨意地玩手機。中環去銅鑼灣，司機大佬竟然行電車路，認真莫名其妙，當他轉入軍器廠街時，我還以為他終於會駛上告士打道，怎知他轉入謝斐道，然後停車。撞鬼！他竟然車了我去六國飯店！這刻我嗰樣大概好似「家有喜事」裏的吳君如，忍不住質問他：「你車我去邊呀，我話崇光喎，幾時話去六國呀！」

司機大佬一句唔好意思都冇，若無其事地開車，施施然再往崇光進發。的士由謝斐道轉入駱克道，住在香港的人都知道，駱克道一日廿四小時都塞到便秘一樣，大約五十米就有一個紅綠燈，在狹小的車廂中，我試圖重組案情，明明我講了崇光兩次，重加埋銅鑼灣，就算司機聽慣普通話，也不會變成六國喎？就當我講錯崇光的控制公司利福，同六國的發音也有距離，真是離奇。這時司機忽然問，行第二條路好唔好呀？我頂！「呢到去崇光，重有邊條路唔塞㗎？」司機居然惡人先告狀，「小姐，塞車我都唔想架，晏晝度度都塞架啦。」估不到689治下，連的士司機都識偷換概念，明明是他聽錯目的地在先，駛了入駱克道，才會塞過蟻躝，重好意思推卸責任，講到是社會錯晒咁款。肉隨砧板上，現在憤而下車，又變了半天吊，唯有飲啖清熱酷，無謂再拗。

回家跟Wikipeter說起這件事，雖然他表面上唯唯諾諾，其實我知道他不會同情我，心諗：「你個港女老婆呀，崇光直情有個地鐵出入口，都要搭的士，明明$4.9可以解決的事，用了$68蚊，搞到一肚氣，抵你死。」

Wikipeter生性慳家，一向不喜歡搭的士，覺得又貴又受氣。事實上，的士司機行錯路的情況很常見，試過去君頤峰，變了君逸山，不知下次去藍灣半島會否變了去紅山半島！過海如果不行西隧，司機面口就黑過鞋底。另外，大部份的士大佬愈來愈冇禮貌，我自問上車落車都會講唔該，但少於一半的司機收錢時會講「多謝」或者「盛惠」之類。

遇上一些喜歡搭嘴，但卻跟你抬槓的司機，竇蓉也只好投降，去年七一遊行後，和同事坐的士回公司，興高采烈地分享：「估不到今年咁多人呀，有成四十萬呀！」吱吱喳喳一輪，的士大佬突然發難：「人講你又信呀，四十萬你知唔知幾多人呀！行一日一夜都未行完呀，我同你計‧‧‧」嘩，我馬上投降，扯白旗：「好啦，我地唔討論啦，你專心揸車啦。」

還有一點乘客和的士司機都受罪的，就是那個天殺的「觸動傳媒」，我每次坐上裝了「觸動傳媒」的車廂，第一件事就是mute了它，運輸署胡亂批准公共交通工具合法滋擾乘客，弄得司機和乘客都十分浮躁。計及收音機、的士台、車廂廣告，兩個陌生人，共處一個狹小的空間，同時被三組聲音不斷轟炸，真是人都癲！

不過竇蓉同一眾中女，經常著斗零高跟鞋，下班時雙腳腫如豬蹄，由中環尾行去地鐵站，路程雖短，其實頗為曲折，搭的士就是為了偷懶不想行這段路。唯有奉行不多嘴，不抓狂的原則，繼續自作自受。